(附相片。噁心！慎入！)
(相片由患者提供)
都唔知香港腳呢樣野，係咪真係皮膚病黎既，呢個個案都唔似醫皮膚病既。既然係香港腳 (HK Foot)，就叫呢位病友做病友F啦。要保障私隱呀！
主角病友：病友Ｆ
主診醫師：黃智偉醫師
就診診所：匡信中醫專科診所(新蒲崗)
(當時黃醫師有係新蒲崗診所駐診的)
盈柏中醫診所(晴朗)
是次個案：
病友Ｆ好多年前開始已經係濕診病患者，經西醫皮膚專科確診的。久唔久發下，一發就好痕，皮膚好易損。佢印象中年輕時最初期因為經常接觸清潔劑而皮膚痕癢，好易抓爛手腳及小腿，腳趾爛到起泡出水已經唔係第一次。唔知呢d係咪會周圍惹開，最嚴重試過有一次連背部都爛開晒，越爛越大範圍，不停出水，睇左好多次醫生試左幾款藥膏都唔好，最後經醫院急症室轉介皮膚轉科，轉搽一隻藥膏一星期內好番晒。之後皮膚科跟進埋d手手腳腳，搽藥膏好番晒，但斷斷續續會發，發又去皮膚科覆診，一搽果隻藥膏就唔痕會好番。d神藥膏個名一樣的，只係每次處方份量可能唔同。當時年少無知，佢覺得世上有止痕神藥，用唔晒既藥膏當寶咁收埋，一痕就拎黎搽，反正濕疹唔會醫得好，有神藥在手唔會痕非常好。
好啊！神藥在手無有怕。不過都係以前既事啦。後來，F病友發現自己對腳既皮膚越黎越薄，痕果時輕輕捽下已經損，有人話佢知佢用緊果d藥膏叫類固醇，不能長期使用，原來，佢自己已經不知不覺整壞左自己的皮膚了。
今次隻腳發作同以前一樣，都係話濕疹，腳板一粒粒，好癢，重災係腳趾公，爛肉兼出水，仲有惹開其他腳趾跡像。同以前一樣，都係處方濕疹藥膏､腳癬藥膏，但唔得，搽左都係又爛又出水，無計之下都係用番類固醇。點知今次連神藥類固醇都唔得，仲爛同出水嚴重左，好驚，去左睇中醫。
初期中醫治療外用中藥浸腳同內服中藥好似幾理想，好似好緊架啦，無啦啦又爛番，又出水，之後浸另一啲藥水，脫皮，停左出水，但啲皮都未脫晒，又再爛同出水啦。
病友F友覺得真係好煩，因為爛肉出水，日日要貼膠布先著襪著鞋，返工著鞋著一日，就咁焗住一日，情況無好過。因為隻腳甩好多皮係對襪度，咁無理由日日扔一對襪架嘛，對襪就要分開洗同消毒，真係人都癲。
就咁斷斷續續搞左成年先轉搵黃智偉醫師，係診所直頭除埋膠布比黃醫師睇，d爛肉真係好令人覺得噁心，但黃醫師都肯醫喎。初初淨內服中藥藥效較慢，黃醫師叫佢每日返到公司換拖鞋比對腳抖氣，唔好比對腳有腳汗焗住，病友F唔肯，點可以係公司著拖鞋咁無禮貌，而且比同事見到佢爛腳咪乜面都無晒。咁黃醫師開草藥比佢煲黎搽患處，一星期煲一次，每晚整番熱d藥水搽患處，不用浸腳，範圍不大唔好浪費d中藥。黃醫師叫佢唔好貼膠布，改用紗布，紗布比較透氣又可以保護住隻腳趾唔好比襪再刮損，同埋如果痕就要忍住唔好再抓損患處。搽左幾日中藥水就停左無再出水，都繼續搽住，一段時間無再出水有好轉，就停左唔使搽，但黃醫師好奇怪點解好得咁慢。
黃醫師向病友F的生活習慣入手，問症知道病友F食野無辣不歡，又鍾意食生冷野，有時會朝早沖完涼就出門口返工，仲試過遇到睇唔開既事嬲到眼花睇野唔清楚同手震，出現過暴食情況（即係因為好嬲，就算飽食到嘔都照塞ｄ食物入口）。所以間中把脈會把到肝火同胃火，當隻腳趾爛左之後，呢一連串野都會藤㨢瓜瓜㨢藤咁影響到皮膚好難好。
黃醫師要求病友F首先要戒口，戒辣戒甜戒凍食戒花生，病友F初初唔肯，有藥食有好轉緊做乜要戒口，如果要戒口先好，咁咪以後乜都唔使食，一食又爛咪即係成世都唔好。黃醫師好有耐性同佢解釋，唔係咁樣的，佢果時既情況唔戒口就難好，病友F本身脾胃較差，濕重，所以每次天氣落雨或朝濕既時候患處會發得比較嚴重，辛辣同刺激性食物本來就唔適合F病友。但當完完全全醫番好之後，身體情況許可間中食下刺激性食物隻腳趾就唔會再發架啦。黃醫師同病友F講有樣野叫醫患合作，醫師唔係神，都需要病人既配合同合作先會有好既治療效果，如果F病友唔合作唔戒口，點食藥點搽藥都好難好架啦。
另一樣要病友F要注意既就係唔可以對腳完全未乾透就著襪著鞋。如果無可避免一定要朝早沖完涼先返工，就再早d起身，等對腳完全乾透先好用紗布包住患處再著襪著鞋。絕不能貪快用風筒吹乾，咁會刺激到皮膚的，有時就算表面乾左，都未完全乾透的，一定要乾透先好包紗布著襪著鞋。
再者就係脾氣，黃醫師開藥比佢降火，但叮囑不能長期依靠中藥去降火，當d火去左，就要學習控制情緒，要學習做情緒的主人，唔好令自己被情緒控制，令身體情況轉差。
嗯嗯！病友F見黃醫師咁苦口婆心，好似幾有道理，就免為其難配合下啦。有心做，唔會做唔到既，病友F諗住如果戒口唔亂食野都好唔到，就去剝左醫師棚牙！（哈！哈！哈！一早坐定定等睇戲！）
點知，原來黃醫師講得啱既，乖乖地聽黃醫師話就唔止隻腳趾情況慢慢有改善，病友F覺得自己心平氣和左，佢屋企人都話佢脾氣好左，公司ｄ老細都佢問點解而家對住ｄ麻煩人都忍到唔發脾氣。人冷靜左就會對一d 事既睇法唔同左，亂食野發洩情況少左，就慢慢好囉。
幣喇，病友F無聲出添。治療其間病友F試過偷食花生，偷食辣海鮮麵，同朋友食飯無蝕底食埋燒鵝，原來一食係真會令好緊既腳趾再發得嚴重，覆診時比黃醫師見到問佢又亂食過乜野黎，佢死人都話有戒口，無亂食野。病友F 都傻傻地既，你估真係會厄到醫師架咩，厄唔到架。佢話有次突然聽到黃醫師嘆氣，問佢係咪治療其間戒下口真係咁難架呢。為左面子，病友F 梗係唔出聲啦。不過其間間中亂食野再發嚴重番既情況好快會控制到，就係咁慢慢好。醫左一段時間有一次黃醫師同病友F講可以唔使再包紗布啦，不過仲未完全好番，要繼續戒口一段時間。嘩！唔使再朝朝好麻煩咁包完紗布先著襪，病友F聽到果一刻真係超開心，唔使再比錢買紗布，每朝又可以瞓多五分鐘啦！
其實病友F隻香港腳比黃醫師醫左大約九個月已經好番。如果唔係其間唔肯同醫師合作，又唔戒口，又容易火起搞到反反覆覆都唔會醫咁耐啦。佢大約今年一月已經好番，不過唔憤氣，要睇定d先，睇下係咪同黃醫師講既一樣，好番就唔發。好番之後病友F試過食辣野，又有食花生，經過左冬天､春天､回南天的潮濕､落雨天，到而家夏天熱啦，出汗啦，真係無再發喎。病友F 仲話唔知係咪戒口戒左好長時間（其實得幾個月之嘛），口味好似變左，辣野、花生同辣薯片都好似變到唔係幾好食，而家鍾意飲熱水，索性清淡d學人玩下養生咁啦。
咁病友F 有無向黃醫師道謝呀？病友F話梗係無啦，黃醫師係醫師，醫人係佢duty黎架嘛。同埋之前質疑人又頂心頂肺咁對黃醫師，點會咁瘀皮走去同人講多謝呀，呢d個心入面多謝架啦！心照啦！
黃醫師，成日激你果個病人話係個心入面同你講左多謝喎！哈！哈！哈！哈！
果然係傻既，醫師幫到人都會開心架嘛，知道病友好番就夠架啦，唔會咁計較架。我識果d超級好醫師全部都唔會同病人計較的。
真心唔知呢個乜病黎既，醫香港腳會醫埋個胃醫埋情緒咁複雜既。呢d可能就係傳說中既抽絲剝繭式治療法（呢個名我作架！哈！哈！哈！）。不過有一樣野真係事實黎既，『醫患合作』係重要。如果一個病人放棄自己，唔聽醫師話又唔同醫師合作，咁就算個醫師幾叻幾有心機醫，都好難好架啦。難委自己辛苦自己有乜謂呢！仲有一樣就係真係想徹底醫好既話，係需要有耐性的。
沒有留言:
張貼留言