(附相片。噁心！慎入！)
得到病友B小姐及其家人的同意，與各街坊好友分享她的個案。相片由B小姐家人提供。為保障病友私隱，主角病友以B小姐專稱。
主角病友：B小姐
主診醫師：黃智偉醫師
就診診所：匡信中醫專科診所(新蒲崗)
盈柏中醫診所(晴朗)
病因簡介：
B小姐自小皮膚很差，是西醫皮膚專科的常客，亦曾經因身體某部份皮膚經常發炎腫脹而做過手術。一班佢勁討厭既朋友，如皮膚痕癢､濕疹､暗瘡之類，經常打搞佢，令佢好困擾。而今次轉向中醫求診是因為毛囊炎發至令佢疼痛非常，影響生活。
是次求醫經歷：
今次發病的位置於腋下(即格筋底)，好似生瘡咁，唔痕但好痛。對一個女仔黎講，皮膚病發於腋下總比發於面上好。今次同以往一樣，即刻搵西醫，就連皮膚科醫生都話好多時病發既野係無原因，懷疑入面有膿泡，唔知會發到咩程度，先服用抗生素，搽皮膚消炎藥膏一個療程。但係，今次好似同以前有d唔同，服用抗生素同搽藥膏無效，舊野仲越發越大，令B小姐痛到要夾住格筋底就住就住個位黎行路，其實夾住都好痛，搞到姿勢好古怪，好異相。人地女仔黎架，好嚴重影響生活同工作架嘛。B小姐及其家人開始懷疑會唔會已經出現抗藥性，又會唔會咁啱果段時間患者受到好大既壓力而令情況惡化，覺得長期服用抗生素都唔係辦法，於是嘗試睇中醫。
中醫治療：
B小姐實在太痛，抱住即管試一試心態，經朋友介紹到診所找黃智偉醫師求診，只向黃醫師講出症狀，亦表示明白中醫治療效果或會較慢，但實在很困擾，希望黃醫師幫到佢。
黃醫師為B小姐脈診及檢查過患處，表示B小姐患上毛囊炎，中醫病名叫"癤"，患處發緊炎，發到咁大，皮膚內裏深層處極可能藏有濃泡，只是外表睇唔到。B小姐心想，咦！點解黃醫師係中醫，斷症講既同西醫一樣既？B小姐開始覺得有信心，耐心聽黃醫師解釋，B小姐本身皮膚差，體弱，濕重，經絡唔通塞住，引起發炎，建議B小姐內服中藥，以通經絡及清熱祛濕為主；因腫起地方痛至影響到日常生活，又擔心情況如果再拖落去，到天氣熱會出汗既時候B小姐會更難受，所以都建議用中藥外洗加快消炎止痛效果；同時亦要讓患處保持清潔及乾爽，不要用刺激性消毒藥水例如酒精之類刺激皮膚，只要保持清潔乾爽即可。
黃醫師表示醫治皮膚問題，用要煲既中草藥比藥粉效果較佳。但B小姐未煲過中草藥，覺得煲中藥好麻煩，又唔想麻煩屋企人幫佢煲，要求黃醫師開藥粉。黃醫師話外洗中草藥同藥粉比例唔同，如果外洗用藥粉要用好大量，唔化算亦太浪費。最後只開了內服中藥粉，建議B小姐可到市面買一些含特定成份的中藥水搽患處消炎止痛。（在此不會說明特定成份是什麼，因為人人體質不同用藥都不一樣。）
原來買中藥水很困難，一般藥房沒有的，試過去賣國貨既地方都買唔到，問過d 職員話B小姐要搵既藥水以前有賣，但因現今藥物進入香港既檢查好嚴格，果種藥水而家無再入口，係香港應該搵唔到。最後托朋友在國內中醫院買得到。內服藥 + 搽藥水明顯有好轉，雖然未好但已經唔係好痛痛，不用再夾住格筋底就住就住咁行路。
托朋友買的中藥水好細樽，搽搽下發現藥水有渣，又開始擔心掂唔掂，仲繼唔繼續搽好呢。覆診時問黃醫師，藥水由草藥製成，有渣都正常，未過期應該無事既。黃醫師叫B小姐唔好太擔心，太擔心造成心理壓力又會影響到身體。B小姐覺得中藥水有用，但用得唔安落又唔敢用，自己煲應該更安全，但日日返工好忙又夜放工，根本無咁多時間煲藥。黃醫師表示自己煲中草藥外用搽患處都可以煲一次用幾日，但強調只可以放雪櫃保存不多於一星期。黃醫師教B小姐點煲中草藥，煲好放落碗用保鮮紙包好放入雪櫃存放，用既時候倒少少出黎整翻熱，暖暖地就可以搽，盡量令中藥水留停留係皮膚吸收。B小姐終於妥協，除內服中藥粉，肯煲外用中草藥。
是次中醫診治經過約三星期已康復，舊野消失左啦。
B小姐的心聲：
B小姐感激黃醫師醫好皮膚今次發出黎果舊野，覺得黃醫師係一個好細心亦會為病人設想的好醫師。B小姐都曾經聽過人講話煲中藥沖涼，一聽到已經好抗拒，亦唔會想到搵中醫幫手。點知黃醫師知道B小姐得難處，同B小姐解釋煲中藥一樣可以搽，只不過中藥水一定要放雪櫃及有保存期限，解決左無時間經常煲藥既問題。B小姐現在相信中醫對皮膚問題的療效，下次再比果d令人好討厭既皮膚問題纏住既話，都會考慮先搵中醫，始終不能長期依靠抗生素及類固醇。B小姐話唔知係咪自己心理作用，今次服用中藥後身體都好似好左，個人都好似無咁容易覺得凍。
編者的感想：
好多人都會覺得皮膚出事第一時間搽類固醇及食抗生素醫得最快，我曾經都覺得係。但日子耐左，d副作用就會浮出黎，好似d皮會越黎越薄，會有抗藥性等問題。就算知有副作用，都已經無得返轉頭。我都相信中醫對皮膚問題會醫得比較徹底根治得到，但都要記住呢個世界無神醫既，無論個醫師幾好都好，患者本身都要有耐性及與醫師合作呢。
題外話，聽講B小姐今次的中醫治療過程都發生左一段搞笑小插曲，令我忽發奇想又想到一個新角落，下次先在新角落講下呢段搞笑小插曲。
［編者於2017年5月7日發表］
用棉花球將暖既中藥印上患處，乾左再印上去，
等皮膚吸收。
(睇相都覺得噁心！)
(舊野縮細中，都係咁噁心！)
沒有留言:
張貼留言