乾針療法

《乾針療法 Dry Needling》

未認識方醫師之前，我完全未聽過乾針療法。都係果句啦，太深既學術性野我唔識，呢度唔會有學術性野發表，只有我自己去理解真係有效先會寫出黎。

乾針療法係其中一種針刺療法，與傳統中醫的針灸不同。乾針以解剖學為基楚，需要完整的骨科評估，針對一d 疼痛觸法點落針，以達至舒緩疼痛既效果。好講求醫師手勢同技術既針法，支針落到幾深，係邊個位落，好講究的。我個人覺得乾針同近年興起既激痛點針灸療法有d 相似。

每樣野都有好處唔好處，以我理解，乾針好處對運動後肌肉疼痛或神經性創傷有非常好的療效。唔好處係落針時比較痛，痛楚會維持持一段短時間。

唔係自己見過我唔會信，我真係見過啦，方醫師用乾針療法幫一個返工返到肌肉長期處於緊張狀態，對手失去大部份活動能力（舉唔高手，不能向後伸展，連普通拉筋動作都做唔到），經常被肌肉疼痛折磨到瞓覺都痛醒既病友治療，該病友話方醫師先用傳統手法針灸留針，再針對佢對手同膊頭既肌肉施以乾針療法，教佢做一d鍛練運動，而家佢對手既活動能力大大提升番，瞓到覺啦。

該病友講野好好笑，佢話乾針好似好痛咁，d肉酸得黎仲會跳一下，但治療痛果一陣，換番黎就係一段較長時間既舒服，果下感覺真係正到呢…… 仲話方醫師都傻既，叫佢配合下返屋企做下方醫師教既鍛練，如果有時間又唔懶又肯做運動既話，就唔會搞成咁啦。佢唔聽話唔做運動激方醫師，但方醫師仲好有耐性幫佢治療，用乾針幫佢對手做被動運動，即被動鍛鍊，而家有番少少肌肉支撐番啦。但佢唔比我影相囉。佢唔比我影我咪影醫腳果位朋友囉。

呢間診所好似有個特點，就係d 醫師都好好脾氣好用心幫人。

有一點要強調既就係，唔係聽人講佢識我就信，不論傳統針灸方法或乾針療法都好，始終係落針落身體度，一定要搵受過專業訓練既醫師先好試。註冊中醫師們當然受過專業培訓，攞左牌先可以幫人針灸啦。乾針唔似傳統中醫針灸，好似近代先有，我梗係又去調查証實過方醫師真係有進修有接受過專業培訓先寫出黎啦，張証書係 Advanced Lower Body DN Dry Needling course by David G. Simons Academy.

方醫師係一個好專業既中醫師，並唔係你叫佢點針就點針，佢一定要幫病人檢查清楚，或做過測試，或需要影像片輔助，先會決定邊種治療方式係對病人最好的，治療方式又唔一定用針灸，有d 情況會用中藥的。

方醫師進修接受乾針專業培訓，只係學多一種針法，多一種幫助病友的選擇或輔助方法而已。又搞到人地諗起診所創辦人啦，又係咁架，佢地係好傳統既中醫師，懂得傳統既中醫針灸，用中藥又講究，但又保持廣闊既眼光又肯接受現代新思維新技術既好醫師黎架。佢地唔會固步自封，中醫都要跟住時代不斷進步架嘛。就好似傳統既手法針灸，醫師會留針再轉下支針（運針），發展到現代好多醫師都會加電針，我地會感覺到邊針邊跳跳下咁囉。

張相係方醫師用乾針療法，

抽起舊肌肉先落針。

每種針法都有不同限制的。

[編者寫於2018年10月29日]