近日，係某間社區診所，見到有街坊預約貼天灸，完成手續後，我聽到助護姐姐同街坊講：「已經預約左，邊日邊日，到時你拎番張紙番黎；唔洗而家比錢住，第一次貼天灸既時候先一次過比晒個費用，並唔係每個人係都適合貼天灸架，要比醫師把過脈先，如果唔適合做天灸既話就更加唔需要比錢啦！」
嘩～診所好似進步左喎！我又諗番起之前某一次係貼天灸日子既時候，係某社區診所見到的點滴……
場景：某社區診所
人物：街坊A（預約左貼天灸）
街坊B (預約左貼天灸）
黃智偉醫師（黃）
助護姐姐（CA）
話說，每逢到左貼天灸貼既日子，等睇醫生係會等得特別耐既，醫師們好細心幫街坊朋友把脈，d天灸貼仲要係新鮮製作送去診所，如果助護姐姐太忙唔得閒幫醫師整，就要醫師自己吱落貼幫街坊朋友貼啦。
同埋，以前係要登記預約貼天灸既時候就要先付款架。
某年某日……
街坊A 係黃醫師間診症室貼完第一灸，出黎搵助護姐姐……
A：我想問下我張紙約左之後d 天灸貼係咪頭先果位醫師幫我貼架？
CA：你比張紙我睇下……拿，根據你之前預約左，第二貼係……第三貼係……第四貼係……
A：咁即係我想之後都係黃醫師幫我貼得唔得呀？我覺得佢好細心，我想佢幫我貼埋之後果d 即係得唔得呀？
（等緊既朋友仔個心咿咿哦哦中：梗係細心啦，你都貼左好耐，等左好耐你都未出番黎，幾時先到我呀）
CA：睇睇先，咁第二貼係黃醫啦，第三貼改邊日幾點你得唔得？第四貼改邊日幾點你得唔得？
A：OK 啦，咁你幫我改啦。
隔左一陣，街坊B 同黃醫師行出黎……
黃：姑娘，呢位先生唔適合做天灸，麻煩你幫佢取消同退番錢比佢吖。
B：咁我今次唔做得，下次黎做二，三，四貼得唔得呀？
黃：要到時再把過脈睇睇你身體狀況先知你做唔做得架。
CA：X先生，唔緊要架，而家退番錢比你先，幫你預約埋下次個時間，比醫師睇過如果真係適合做，先再收錢吖。
B：咁好啦，唔該係幫我約邊日邊個時間啦。
（朋友仔心諗，下！醫師咪即係白做？嘩～無得貼仲唔收錢，咪即係免費諮詢同把脈，仲要朋友仔等咁耐，一定講得好詳細。唔得，到我睇醫生果陣一定要問番夠本先得！）
嗱！都話架啦！呢間診所好均真，d醫師唔會為左賺錢而厄人做天灸架。適合就細心幫你貼，唔適合就話唔適合，好有醫德架！
不過真係要麻煩各位街坊朋友係貼天灸既時候真係要比d耐性等候啦，醫師細心又認真對待病人，我地都要有耐性候診，回報番d愛心醫師吖～
話時話，d街坊做天灸貼真係抵都爛，佢地診所好多年無加價，慈惠診所同埋近期新開既社區診所仲有優惠價，仲要唔覺意又比我見到佢地樣樣都係親力親為自己做，d藥膏貼100％肯定係真材真料。貼天灸貼果陣仲有愛心醫師把脈同解釋，諮詢費或診金都慳番唔洗比添。
診所創辦人真係我偶像黎架，佢可以堅持到提供優質服務但收費唔貴，唔係人人做得到架！實在太好人啦！
(豬事丁寫於2018年6月23日)
沒有留言:
張貼留言