有感而發-家庭中醫師

家庭中醫師，有你，我放心！
My Family CMP Walks with Me!

我好鍾意好鍾意呢張海報，可惜唔係間間社區診所都有張貼出黎。只得其中兩間社區診所有貼出黎，咁都比我見到，係咪好勁呢！哈哈！我將個名改成《家庭中醫師，有你，我放心！My Family CMP Walks with Me!》

曾經見過一篇訪問，一個係屋邨開左好多年既西醫話，屋邨西醫同街坊有街坊情，比較有人情味，就好似病人既家人咁，可惜而家越黎越少，唔係無舖，就係比醫療集團壟斷。

我就唔多同意呢個講法。有無人情味，其實都係睇個醫生本身既個人修養同有無醫德架啫。西醫我都有由細睇到大既醫生架，好多居民都係慣性的，收費不特別平，但貪藥性快貪方便。以前睇西醫會同d街坊吹水，唔覺睇好耐用好多時間，但而家唔同晒啦，屋邨睇西醫咪一樣要等到發毛，個個睇傷風咳兩三分鐘就睇完，但等見醫生等攞藥，加加埋埋要成個半鐘先走得。我好記得以前未遇到匡信同盈柏既時候，有一次因半夜腳抽筋抽到好痛，行路拐下拐下幾日，又長期胃痛去搵由細睇到大既西醫，佢既反應係：無喇，淨係得抽筋同胃痛咁架咋，你血液循環唔好，自己返去搵d熱水浸下腳，開d 胃藥比你啦。我到而家都好鍾意由細睇到大呢位西醫架，佢都變左醫生伯伯，仍然有開診架。不過我好明白中西醫睇野角度唔同，所以處理方式都唔同囉，好多年無搵佢lu。

唔知有無人好似我咁架呢，由細到大抽筋同胃痛係家常便飯，一抽個腳瓜就乸埋一舊痛到流眼淚，之後好痛拐下拐下行路，最少痛一個星期，食左抽筋丸都係咁。嚴重果陣大脾都會抽埋抽到好酸痛。胃痛照胃鏡又無事，食胃藥會舒服，胃藥又平又容易係藥房買到，搞搞下胃藥當糖咁食，終於搞到間中會腸抽筋，果種感覺係個肚痛到企唔到起身要，彎住條腰屈住個肚被人送去急症室，之後自己知道果種痛叫腸抽筋，自己都識入急症室，打針，瞓到唔痛就可以出院。

呢d 一般都叫都市病，血液循環唔好就抽筋，唔知點解會抽到咁痛要痛咁多日，唔知點解會成日胃痛，唔知點解會腸抽筋，一般都係話你個人緊張啦，無做運動啦，唔知點解啦，醫學上既野好多都原因不明架啦。

而家就唔同呢，我有家庭中醫師，會睇身體狀況變化開中藥幫我調番個脾胃，又幫我針灸拔罐通經絡止痛，仲會鼓勵你自己做運動幫番自己，好靠得住，好多野都解釋到，所以有乜頭暈身㷫都會去搵醫師幫忙，好多問題都好放心咁講，家事公事乜都講得。我覺得我的中醫師先係堅有人情味，以前d街坊醫生對病人既關心完全返晒黎。睇左中醫之後，都無乜抽筋，無乜胃痛，好多年無同人爭入急症室啦。調番好個身體之後，連傷風咳都無乜。

其實呢，我的家庭中醫師，唔止一個架！哈～哈～哈！佢地好勁好好耐性，幫緊好多奇難雜症既病友架！哈～哈～哈！