尚然堂（堂友資訊站）Prime & Naturals Patients Corner: "體貼中藥驅蚊包" 及 "中藥驅蚊包Q & A"

體貼中藥驅蚊包

哇～哇～
匡信中醫專科診所有中藥驅蚊包，盈柏中醫診所有中藥驅蚊包，原來尚然堂都有呀！係其中一間尚然堂見到的。不過就唔見有Q & A貼出黎，唔緊要啦，心急要將呢件事話比堂友知，咁用住匡信出果張Q & A先啦，一樣架姐～

我都有份向診所反映希望診所會方便一眾街坊提供中藥驅蚊包架。話說之前係匡信個facebook官方專頁見到佢地介紹中藥驅蚊包呢個方法，咁我真係好有需要，以前我屋企有一隻大肥蚊，我坐係度就淨係咬我一個，就算我d血好好味都唔洗淨係咬我架，害到我成日抓到d手手腳腳損晒，隻衰蚊就吸我d血吸到肥肥黑黑，真係火都黎。但我都唔會用蚊怕水呀，驅蚊劑果d化學野，陣味勁難頂之餘，身體吸吸埋埋咁多化學劑都唔知會唔會有問題架。

但係咁，雖然我勁有興趣，中草藥驅到蚊就好啦，好過用化學劑果d啦，但又唔知去邊度買，網上search 咁多種類，又唔知邊種先啱，去藥材舖執又驚比人厄，執包草藥返去又唔知點搞，好煩的。

坦白講，我初初以為診所肯執藥咁執賣比一眾街坊病友己已經好好架啦，真係無諗過係咁體貼架。買左個驅蚊包返屋企拆開一睇，真係好感動，完全感受到診所為一眾街坊服務既誠意。有防透氣密封錫紙袋包裝，內有兩個裝有中草藥的獨立驅蚊包，乾淨企理，全完唔使煩，開封後三至四星期有效。講真，中草藥既野，我呢d門外漢識條鐵咩，唔好以為睇得醫生多就會識，食藥粉架嘛，點知d 草藥咩樣呀！自己出去執仲要搵個袋裝，真係煩死人。而家診所全部搞掂晒，衛生又企理，買番屋企就用得。我真係無想過有咁好既服務先賣25蚊一包仲要有兩個（即係12.5一個，仲要咁耐都無加價！），淨係個密封錫紙袋都唔平啦，仲要執藥､包同整呢，唔知診所使唔使蝕架呢？感動死人咩！！

咁當然，本站主真係比錢買左返屋企用過覺得好用又堅work既先會拎出黎推介啦，好老實架嘛。嘻嘻，掛左出黎之後真係無見過成日吸我d血又打極唔死果隻大肥蚊出現喎（唔知隻大肥蚊餓死左定係去左第２度搵食啦，總知我就無再見果佢啦！我一諗起呢單野都會偷笑！）。唔止咁呀，個驅蚊包入面d中草藥仲好清香架，尤其放工/去完街返屋一打開門，一陣清香撲埋黎，香噴噴吖。真係正！正！超正！！

仲要話埋比你地知，經驗所得，大約掛左三個多至四星期咁上下啦，d草藥香味慢慢消失就會失效架啦，咁梗係即刻換啦，咁又無再比蚊咬啦！成個驅蚊包都係天然草藥，香噴噴，安全好多。

******************************************************
中藥驅蚊包Q & A

１．驅蚊原理是什麼？

　　蚊是濕熱性生命，蚊包裡都是辛燥祛濕的藥物，這些藥物揮發出的氣味，會令蚊蟲誤認為環境變得乾燥，蚊蟲會變得不喜歡留在這樣的環境，故達到驅蚊的功效。

２．成份是什麼？
　　丁香、艾葉、白芷、紫蘇葉、薄荷、石菖浦、藿香、金銀花，共8種藥材。

３．有效時間多長？
　　實驗所得，氣味長達三星期。

４．一個驅蚊包的有效範圍多大？
　　室內：有效150-200呎。
　　室外：未曾進行實驗，故此未知戶外驅蚊功效。

５．會唔會生蟲？有蟲點算？
　　(1) 因為是天然草本，沒有添加劑，難免有受潮發霉的情況。如有，請扔掉。
　　(2) 如打開密封牛皮紙袋時發現有長蟲的情況，請回到診所更換新的蚊包。

６．應如何保存？
　　如牛皮紙袋未曾開封，存放在陰涼的地方即可。

７．開封後放在哪裡？
　　取出蚊包使用，可掛在窗邊、放置在窗台或出入口，並盡量放置在乾爽的地方。
　　如環境潮濕，會降低使用時間。

８．孕婦、氣管敏感患者是否適合使用？
　　成份對孕婦及胎兒並無影響；對氣管敏感患者無刺激。

９．G6PD (蠶豆症) 患者是否適合使用？
　　蚊包成分之中的金銀花及薄荷，據報有機會對蠶豆症患者有不良影響。但蚊包因為並非內服及直接接觸皮膚，而且劑量非常輕微，因此對蠶豆症患者沒有不良影響。
　　如若擔心有不良影響，可以將劑量減少一半試用。
　　*若顧客仍有擔心，不建議使用。

１０．除蚊以外可否驅蟲、驅蠓？
　　　蚊包沒有驅蟲的效果。但有一定的驅蠓作用。

******************************************************
係診所見到的中藥驅蚊包單張及匡信出的“中藥驅蚊包Q & A”